16. viestule / Par Boņukim i eksperimentim

Vasali!

Nu Boņuku bolvu padūšonys gondreiž nedele apleik, puorskaitieju oficialūs atstuostus, puorskaitieju naoficialūs, nu tai kai gribieju pīraksteit ari par tū koč kū, bet dreižuok nasaguoja, tod nu byus juoskaita šudiņ.

Pošai taida divejaida sajiuta – gon prīca, gon reizē skumis par tim sovim Boņukim. Prīca par pārnajā godā padareitū dorbu pi LaKuGys i vēļ leluoka prīca, kai Vineta tū dora niu, ka tam vysam ir turpynuojums. Nu reizē ari skumis, deļ tuo ka pa lelam tys, ka najiedžu labi sadaleit dorbu i sovu dzeivi, drupeit pajiemu vysu par daudzi pi sirds (nui, kuortejū reizi teicamneica manī dorbuojās iz uh!), rezultatā zaudieju interesi i prīcu par cīši daudzom dzeivis lītom. Puorsastruoduošona pi LaKuGys reizē ir ari īmesle, deļ kuo izliemu, ka ir juomaina dzeive i aizbraukšonu atrodu kai puormaiņu veidu. Taitod vīns variants atzineibai ir cīši lels dorbs, tik muna īrostuo bāda, ka pajemts par daudzi tys vyss i piec taida dorba gryuts prīcuotīs par atzineibu.

Svātdiņ, piec rezultatu izziņuošonys, par reizi gribejuos pīraksteit kū ta par latgalīšu literaturu, nu pa nedeli muns spors kam ta leluokam tai pa mozeišam apmyra, deļ tuo rokstu itepat. Drupeit ar smaidu, nu lela prīca par Ilzis stuostu „Puiku mežā”. 2011. goda beiguos Ilze saceja, ka apsavieruse situaceju ar jaunū prozu latgaliski, dūmojūt, kū dasaceit Boņukam, i asūte bādu īleja, nikuo navā! Deļ tuo jai ir stuosts, kū varātu dalikt LaKuGā, kab byutu vysmoz kaidi varianti. Saceju, ka ar napacīteibu gaideišu i dalikšu koč pādejā goda dīnā. Bet, cikom beja Jaunuo goda svātki, cīši daudzi nabeju pi datoru i Ilzis stuostu e-postā atrodu viņ iz reizis piec Jaunuo goda, tys zeimoj – ka myusu plans drupeit izaguož. Bet nu nikuo – izlēmem, ka tod byus 2012. goda nominacejom. Tai ari saguoja, ka beiguos 2011. goda Boņukā latgalīšu prozys nabeja vyspuor, bet ar „Puika mežā” vyss labi saguoja, i tys sagaidieja sovu kuortu iz Boņuku. Es jau vysod asu sacejuse, ka asu Ilzis talanta fans – vysuos sferuos: gruomotu karmā, literaturā, publicistikā, reklamā i zeimiešonā. Taipat ari jaunuo gruomota „Munā sātā”,  kurys stuosts Kripoka mūzys i Ilzis raksteitprasmis rezultatā rodīs puora stuņžu laikā, ir lobuokais talanta pīruodejums. Bet nu tymā latgaliskajā literaturā vyss laikam ir drupeit tāda bādu leja, vysmoz tai saīt ari piec sviežuokuo LRT raidejuma par latgalīšu literaturu. I vysa vaine pa lelam ruodīs taišni tymā, ka školuos Latgolā datryukst tuo poša vīnkuoršuo latgaliskuma, kur ta vēļ īspieja vuiceitīs raksteit latgaliski – tei kai taids nasasnīdzams sapyns. Vajadzātu izaugt ar tū latgaliskumu, na izaugt nu tuo. Vysur gon jau nav cik švaki, bet tī tik taidi pateikami izjāmuma gadejumi „troku” školuotuoju vadeibā. Pagaidom.

Atsagrīžūt pi Boņuka padareišonys, ūtrs veids, kai tikt pi Boņuka, ir vīnkuoršs eksperiments. Eksperiments, kas reizē ir pīruodejums, ka vys tik tei literaturys situaceja ir tyva tam „biedeiga” apzeimiejumam. Vaira kai godu struodojūt pi LaKuGys, secynuoju, ka latgaliski gona pīraksteit koč pošu seikumu, i par tū jau byus vysim lela prīca. Byus kū LaKuGā dalikt, byus vareiba jaunu autoru iz kaidu pasuocīni paaicynuot, byus kū Boņukam nominēt, latgaliski raksteiti dorbi kaidūs školānu konkursūs, automatiski teik skaiteiti par vierteiguokim deļ publiciešonys i tai iz prīšku. Kvalitate cieški viņ palīk ūtrā vītā aiz latgaliskuo vuorda (koč ari laiks taipat izsejoj gryudus). Tod nu itū vysu pīdzeivojūt, izliemu, ka varbyut ari es varu pīsadaleit tymā kaitā, kū sauc par „latgalīšu literaturu” i sataiseit eksperimentu. Raksteit maņ pateik, nu školys laikim vysod asu skriceliejuse paņteņus apsveikumim i leidzeigim gadejumim (Kornēlejis Apšukryumys lobuokūs tradiceju turpynuotuoja you know!), koč niu kaidu taidu atrūnūt breinumūs juoizplieš acs i juoīsasauc „Ak, muns Dīvs!” (nu, na jau aiz sajiusmys). Tod atguoja viests par tradicionalū Pītera Jurceņa jaunūs autoru konkursu, kurū reikoj Naukšānu pogosts i saprotu, ka tei tod ir īspieja eksperimenta realizacejai. Atsaroda 10 dzejūli, atsaroda pseidonims i… rezultatā sovā jaunajā rodūšajā CV varieju dalikt „2. vīta Pīteram Jurceņam veļteitajā jaunūs autoru konkursā” i Annys Rancānis atzineigus ceļavuordus, ka „pateik” i „taidi svaigi”. Prūtama līta, ciļvieceiga prīca par sasnīgumu sadali, nu reizē ari īškejuo naizpratne: Kai tys tai var byut? Itys ir gona tam, kas ir „jaunī autori”? Piec tam tradicionali konkursa dorbu publikaceja LaKuGā, nu kuruos tod pa lelam ari teik kotru godu salaseiti pretendenti Boņukam literaturys nominacejom (vīgļuok sasnīdzamuo i goda nūtikšonu latgaliskuo arhiva vīta), i nu ituo saguojuse nominaceja „Spylgtuokuo debeja literaturā” kategorejā. Tuo vysa rezultatā vēļ vīns īroksts rodūšajā CV par sajimtu Boņuku. Paļdis, prūtams, nu otkon vaicuojumi: Kai tys var byut? Tys kaids nalobs jūks? Kur ir jaunī latgalīšu autori? Vīneigi varu sevi mīrynuot, ka varbyut beju mozuokais švakums nu pīduovuojuma. Ituo vysa eksperimenta secynuojumu daļa:  ir gon tei situaceja cīši biedeiga. Cīši caru, ka itymā godā vyss byus daudzi lobuok (verūtīs piec LaKuGys, jau niu izaver lobuok) i byus kuorteigi kandidati, kurūs nominēt i apbolvuot latgalīšu kulturys Goda bolvuos. Cytaiž ar steigu byutu nazkas juodora, kab veicynuotu raksteišonu. Koč nu ūtrys pusis – tī, kas gribēs, tī raksteis i byus. Nabyus niu, varbyut byus piec trejim godim.

Ite muns pyrmais “nagadejums” ar Jurceņu. /Atzolys 2007/

Jurcens (2 of 2)

Ek, štrunts ar tom literaturom. Tāņ nu sirds gaidu, kod varēs apsavērt Boņuka video īrokstu. Gribīs cīši redzēt, kai tī „Bez PVN” dzīduoja. Muna jaunu dīnu mīlesteiba i nikū es tī navaru sev padareit. Taišni vakar pa televizoru guoja nazkaids raidejums i tī ruodeja mozu rokgrupys koncertu klubeņā, lākojūšys i spīdzūšys mārgys i muosa nūkomentieja: „Tys maņ koč kū atguodynoj. „Bez PVN” koncertus!”. Nui, beja taidi laiki. I itūgod laiks byus taids, ka goda beiguos grupai „Bez PVN” byus 10 godu jubilejs. 10! Īsadūmoj?! Ka jī kai ta sadūmuos jubileju svieteit, tymā šaļtī gon es cīši grybātu byut Latvejā.

Bez PVN 2013 (7 of 8)
Bez PVN reload, foto Laura Pastare

E!

PS nūskaņom koč kas senejuoks nu laika, kod beja cytaiž. Tu myužeigi meklej…

Advertisements

5 thoughts on “16. viestule / Par Boņukim i eksperimentim

  1. Bet, ka tī Tovi teksti, izzynoju niu – beja ari muna izvēle. Tei beja vīneiguo nominaceja, kū Boņukā viertieju. Salyku failūs bez vuordim i pseidonimim, izdrukuoju, nūlyku iz kaidu laiku, lai aizamierst i lai naīsatekmēt. Tod skaitieju i salyku sovā seceibā. Muns favorits vinnēja. :)

Komentēt

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Mainīt )

Google+ photo

You are commenting using your Google+ account. Log Out /  Mainīt )

Twitter picture

You are commenting using your Twitter account. Log Out /  Mainīt )

Facebook photo

You are commenting using your Facebook account. Log Out /  Mainīt )

Connecting to %s