18. viestule / Šudiņ laiks taids lānuoks beja

Vasali i vasali!

Nu tai – muna pyrmuo oficialuo dorba nedeļa šudiņ golā. Piec februara atvalinuojuma otkon sajutu pīktdīnis prīcu. Tik na iz ilgu. Reitu breiva dīna nu reita da vokora, bet svātdiņ ustabenis (vuordineica.lv pīduovoj izmontuot vuordu ustabneica, bet cikom ruodīs par daudzi jūceigs) darbeņš. Dorba stuņžu par itū nedeli cīši daudzi nabeja – tik 17 (10 pi pūdim i 7 pa ustobom), bet taipat tuos sadaleituos dīnys drupeit jūceigys cikom ruodīs. Ak, jau, vyss viņ pīroduma vaicuojums.

Tualetu dorbā šudiņ laiks ruodejuos taids lānuoks. Ka pyrmajuos dīnuos dūmuoju, ka troka palikšu – kai lai vysa paspiej, tod šudiņ tai mīreigi dareju i vēļ palyka puori. Tys maņ atguodynuoja radejis laikus, kod minots da ēteram beja kai vasala myužeiba – kū tik vēļ navarēja paspēt padareit – i iz tualetu aizīt, i čaju sataiseit, deļ tuo ari navajag skrīt ite. Munu pruotu dīzgon daudzi niu nūdarbynoj vaicuojumi par teireišonys leidzekļu i veidu efektivizaceju, laika konsolidaceju i kai paspēt kuorteigi padareit. Gon jau byus i rysynuojumi. Asu īsavuiciejuse tualetu dorba kolegu vuordus. Kai i beja sūleits – jaukys damys. Taipat zynu jaunus vuordus, kai sauc dažaidus leidzekļus, instrumentus, vītys i tai – profesionalismi īt munā vuordu kruojumā. Viņ gryuts maņ pīrost pi tom angļu laipneibom – kotru reizi kai sateiku, tai „Oh, you are doing very well!” i taidā gorā. Es jau kai aizdūmeigais latvīts – gon jau, ka tys teik saceits viņ saceišonys piec. Taipat kai tik īrostais „Goodbye, my love!”. Es sirdī kuorteigs zīmeļnīks. Tai ka suocit beitīs – kod atbraukšu atpakaļ, mož i dabuosit dzierdēt – ū, lavli, ou, voderful, ā, greit, mai lav! :D Nui, i niu kotru dīnu juovalk iuzys, nikaidu auskaru, kruosu i moti asteitē. Par auskarim i brunčim, kurūs navar, maņ vysvaira žāļ.

Itymā nedeļā nikuo jauna uorpus dorba nav, deļ tuo šudiņ vaira ilustrativa viestule ar kadrim nu telefona, par tū, kas par seikumim itūnedeļ maņ ceļā ir gadejušīs. Ai, nā – samaluoju! Beju tak trešdiņ pabā (krūgā). Muosa i Klaivs savuoce nu dorba i jim taids kai pūla (biljards laikam latvyski) treneņš. Tod nu siedieju pakseitī i vierūs, kai Līga vysus apspielej. Cylvāku cīši moz, taipat moz fun i dreiži viņ braucem iz sātu. Dabuoju zynuot, ka izaveru jaunuoka par jaunuokū muosu. Kai jei poša smiejās – deļ tuo, ka nasaballeju, nasakruosoju i nalītoju alkohola. Bet drupeit taida jūceiga atsagrīzšona vītā, kur pyrma tam beju bejuse jau treis reizis – taišni viers tuo krūga muosys nūdzeivuoja daudzus godus da pārnuo goda novembram, kod daguoja maineit dzeivis vītu.

Vierūs portalūs i socialajūs teiklūs par 8. marta prīceigū napruotu Latvejā. Anglejā taida nav. Pučis i kartenis lelai daļai sīvīšu byus 10. martā, kod ite Muotis dīna – tam tod ari veļteita vysa veikalu i reklamu viereiba. He, tikkū taisejūs likt punktu, bet viers golvys otkon suoce skraideit trokuo vuovere. Nui, dzeivoj vīna taida viers ūtruo stuova grīstu i nu reitim skraidelej iz prīšku i atpakaļ, ka trokam juopalīk. Izaruod, ka na viņ nu reitim.

 

Niu gaidu pyrmūdīni. Byus jauni gosti munā golā! ;)

E!

Advertisements

4 thoughts on “18. viestule / Šudiņ laiks taids lānuoks beja

  1. Oi, gryuts Tev tys jaunīs dorbs, Edeit! As vysmoz navarēju izturēt ustobenis dorbu ilguok kai 3 mienešus.
    I vēl, ka bez brunčim i auskarim… Turīs!

Komentēt

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Mainīt )

Google+ photo

You are commenting using your Google+ account. Log Out /  Mainīt )

Twitter picture

You are commenting using your Twitter account. Log Out /  Mainīt )

Facebook photo

You are commenting using your Facebook account. Log Out /  Mainīt )

Connecting to %s