20. Viestule / Nedele Nr. 6

Uorā leits, uorā leits, bet ite esi meili sveikts!

Nūgrauduoja pārkiuņs, spiere zibiņs i es sasajiemu, kab pīraksteitu viestuli. Nalobs vuords – sasajiemu, bet koč kai otkon tei „vajag sasajimt” stadeja kluot. Par reizi grybu atsavainuot – kartenis itymā viestulē ar teleponu taiseitys i pavasara nabyus, kab otkon nav puormatumu par maldynuošonu.

Navaru da gola poša saprast – beja itymā nedelā vēļ (piec pyrmūdīnis) koč kas interesns ci nā. Ruodīs, ka tai drupeit. Pa lelam niu munu dzeivi nūsoka dorbs. Da vakardīnei dūmuoju, ka svātdine maņ byus nu dorba breivuo dīna, nu gols golā vys tik braukšu kuortuot ustobys. Nasaīs vītejuo tolka, bet saīs vēļ kaida mārceņa mokam.

Kod muosys vaicoj, kai maņ guoja dorbā, eisti i nazynu, kū atbiļdēt. Pascieju „Ai, vīns pūds beja cīši aizd***” i pasasmieju par sevi. Pa lelam darbeibys kotru dīnu vīnys i tuos pošys. Sovaiduok ir tod, kod kaids gosts ustobu pīsvaidejs tai, ka „Jezus, Marija!” ci pūds aizadambej, pīmāram. Bet nu ar itū rutinu es varu dūmuot i dūmuot. Tik vēļ naasu tai i izdūmuojuse, kas es byušu, kod izaugšu lela. Tys ir muns suopeigais vaicuojums, iz kuru mekleju atbiļdis.

Trešdiņ beja tys vokors, kod beidzūt pīdzeivuoju naksneigū Redingu. Ar muosu bejom iz taidu kai klubu/krūgu Redingys centrā. „Oakford Social club” – nazkas leidzeigs „Teātra bāram” varātu byut: ka gribi siedi pi galdenim, ka gribi stuovi i klausīs grupu. Nu i dzierdieju tī vītejū piļsātys grupu „The 3.1419 wonders”. Nui, jī poši jau zyna, ka tys nav pī skaitlis. Spielieja tī jī nazkū i spielieja, navaru saceit, ka beja uh i ah. Dzīsmis pa lelam leidzeigys, nu nazkai tei pādejuo tai obejom ar muosu lyka sasaskateit i nūsprīst – hmmm, itei ir! Es par muzykalū vaira, saturiski vēļ nav maņ tys volūdys leimiņs, kab saprastu vysu da gola. Itys braucīņs uorā dzeivē maņ cīši patyka – pusdivpadsmytūs jau bejom atpakaļ. Maņ kai vacim ļaudim pateik – laiceigi suokt i laiceigi beigt, nav vaira kai jauneibā, kod varieja naktim traļlikuot apleik.

Redinga (tierdznīceibys centrs “The Oracle”) nakti
nedela 6 (2 of 3)

Breinumi, na pī
nedela 6 (3 of 3)

Iz vīsneicys dorbu niu ceņteigi braucu ar velosipedu. 4,5 jiudzis (7,2 km) i 25 minoti muna ceļa iz vīnu golu. Atpakaļ gon es tušu i elšu, deļ tuo ka ir vysmoz puskilometru gars kolns pošā ceļa suokumā, kurymā piec dorba tod juoteik. Vakar gondreiž sasakrieju ar mašini – vajadzieja dūt ceļu tai i bremzēt, bet es satraukumā aizmiersu, ka maņ ite na kuojis, a rūkys bremze. Nu vyss labi, pādejuo šaļts cieški viņ ir gluobūšuo. Vīneigi itymā zemē ar velosipeda braukšonu juocar iz lobim reitim saulis ziņā, šudiņ taids na cīši beja, laika prognoze saceja „heavy rain” i Klaivs, darbynojūt mašini, nūsaceja: „It’s England!”.

Vakar maņ tūmār beja taids otkon pyrmais nūtykums itymā zemē – sajiemu olgu par pyrmū nedeli tualetu dorbā i samoksuoju pyrmūs nūdūkļus angļu zemei. 50 mārcenis par vīnys nedelis 10 dorba stuņdem. Itai varbyut piec laiceņa variešu suokt ari muosom beidzūt īri moksuot.

Arlingtona sāta, tī muni pūdi dzeivoj
nedela 6 (1 of 3)

I vēļ maņ golā juosoka lels paļdis draugu puorsteigumim. Votitaite aktivitatem ar vysim talanim i ceglim i pyrmajai paceņai nu Latvejis kai laiceigam Lendīņu sveicīņam – niu maņ ir vēļ vīns šykalads, kū dalikt skaudzeitē pi cytim draugu savastajim Latvejis soldanumim. Tei taida kai geisma tuneļa golā. Gribīs šykalada, cīši gribīs. Koč ari personeigī rekordi jau seņ puorspāti, nu voi tod es navariešu izturēt tū gavieni da gola? Variešu!

Jiusim ari kab breineigys variešonys marta ūtrā pusē!

E!

Advertisements

Komentēt

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Mainīt )

Google+ photo

You are commenting using your Google+ account. Log Out /  Mainīt )

Twitter picture

You are commenting using your Twitter account. Log Out /  Mainīt )

Facebook photo

You are commenting using your Facebook account. Log Out /  Mainīt )

Connecting to %s