26. viestule / Nu tik byus!

Lobs vokors!

Niu gon ari es asu pīkususe. Septenis aktivis skrīšonys dorba stuņdis, velo stuņde, atbrauču iz dvoru – juosataisa muosai svātku vakarenis, vēļ i posūdi beja juonūmozgoj. Tāņ var atsasēst. Tik vysa dzela tei, ka itei ir viņ pyrmuo dīna munā ituos dorba nedelis cielīnī. Beidzūt dabuošu redzēt, kai tys ir struoduot malnu muti uorzemēs. Da pīktdīnei kotru dīnu byus ari vīsneicys dorbs, bet vysmoz sastdīne i svātdīne byus breivys. Nazynu, kam par gūdu, bet itūnedeļ na viņ kotru dīnu īlykts dorbs, bet ari kotru dīnu dorbs byus pa 7-8 stuņdem. I tod vēļ muni tualeti ar sovom divejom kluot i velosipeds. Golvonais, lai kuojis golā turīs pi pakalis, tod jau byus labi! Tik laika prognoze goņ maņ napateik jaunai nedeļai. Pi muokuleišim sazeimuotys leita lasis. Šudiņ gon cīmā beja taida rūseiba – vysūs pakšūs teik grīzti zori, ceineitys mašinis, speid saule, bārni skraidelej – nu taida pavasara jutūne (atlaidit, nav dūmuots kai suoļs rānuos, tik muna privatuo sajiusma)!

Vīsneicā pīkdīne i šudiņdīna beja cīši dorba pylnys dīnys. 10 D ustobys juoizceinej i nikai maņ naizīt tei pusstuņde kotrai. Vyslaik koč kaidi „bonusi”, kam vajag vēļ kluot kai minimums pīcus minotus. Skrīnu, skrīnu, bet šaļtim izīt taids sagurums i atsluobums, ka sevi juosapurynoj. Taidūs breižūs apsaveru iz vysod smaideigū Henreju, kas dīnu nu dīnys struodoj napagurdoms, i daboju jaunu spāku. Augšys stuovā kai dorba bīdru var dabuot ari Viktoru, bet tys navā cik lobs, Henrejs ir smaideiguoks, šmukuoks i lobuok padora sovu darbeņu.

7. aprilis (1 of 2)

A šudiņ munai mozejai (jaunuokajai nu leluokajom) muosai Līgai dzimšonys dīna. Jei izsacieja gribiešonu, kab varātu „Cīlaveņu” kaidu dīnu dabuot, i tod es izkosu škārsteiklā, ka var sataiseit pats. Vakar veikalā gon maņ napatyka produktu pīduovuojums. Labi, kriejumi tys jau ir senejs stuosts, ka tī es nasajādzu, bet gribieju nūpierkt buļbu myltus (stierkele, cīte – saucit kai gribit) – a taidys navā! Jim ir symtu pīci cyti myltu zorti (kukuruzys, taidai maizei, taidai miercei, taidi kas poši ryugst, taidi, kas naryugst i vēļ, i vēļ), a buļbu navā. I kam tys dar? Taipat prostī lozdu rīksti nabeja lelajā veikalā. Bet maņ pasaveice – beja par reizi gotovi apgrauzdāti i sasmalcynuoti. Taišni taidi, kaidu rezultatu golā vājadzieja dabuot nu prostajim. Ilgs tik gon taipat maņ tys torta taiseišonys process beja. Piec vysys cepšonys vakar pasalyka, ka šykaladu vēļ kaidu nedeļu nagribiešu (juorauga krems, ci navā par svīkstainu, juoizlaiza bļūdys ar meikli (navar že montu laist zyudeibā)), bet… šudiņ jauna dīna i šykalads īt vydā, ka nasamat! Nu reita nūdevu Sanitai instrukceju, ka piecpušdīnē juoizjam torts nu soltaunīka ustobā pastuovēt. Atguoju nu dorba, vyss kuorteibā, stuov kuknē, bet koč kai treis molys „pučeišu” ar rīkstim datryukst vīnā pusē… Nu kai tod, muosa beja izdarejuse, kai praseju, bet naapriekinuojuse, ka Kaseja var tai ārtai datikt kluot. Bet nu škode nalela, sabaksteju jaunus rīkstus pa viersu i vyss labi. Ite dasaslēgs Edeite-kārdynuotuoja: ot, itaida muna Anglejis „Cīlaveņa” saguoja.:

7. aprilis (2 of 2)

Vēļ maņ prīca i skume par ūtru muosu (Sanitu). Jai ir tik dorbs i dorbs, ka vīns juos draugs, profesionals menedžers, izdūmuoja sistemu – 8 nedelis jai juopadora kaidys lītys, kū da šam īrosti nadareitu ci vyspuor nikod nav darejuse. Jis tod viertēs kotru lītu punktu sistemā nu 1 da 10 i golā jai juosavuoc vysmoz 50 punkti. Tys ir tys, kū maņ kai reizi vajag! Sabīdruotū munom vielmem. Jau nūpierkom kruosu zeimuļus, byus „Munā sātā” kruosuošonys vokors, īsim kaidu dīnu meklēt „kasteitis” i byus maņ kompaneja ari vēļ vīnam Redingys muzejam! Skumi nu vīnys pusis, ka cylvāks tik tuoli nūsadzeivuojs, ka juoīkustynoj dzeivis dzelom bez dorba caur itaidom sistemom, bet nu ūtrys pusis – maņ grāks naizmontuot īspieju. Ideju, kū jei nikod navā darejuse, bet kū es grybātu, maņ pylns kārmans (he, he)!

Tod nu niu sasateikam dorba nedelis golā!

E!

Advertisements

6 thoughts on “26. viestule / Nu tik byus!

  1. Breineiga ideja Sanitys menedžeram :) I lai izkruosuotu dzeivi – juosuoc ar kruosainu zeimuļu saguoduošonu, super! Jiutu, ka byus pīdzeivuojumi, raibu raibī… Turit buru, muosys, i golvonais, lai daudz jautreibys procesā! :)

Komentēt

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Mainīt )

Google+ photo

You are commenting using your Google+ account. Log Out /  Mainīt )

Twitter picture

You are commenting using your Twitter account. Log Out /  Mainīt )

Facebook photo

You are commenting using your Facebook account. Log Out /  Mainīt )

Connecting to %s