30. viestule / Daņči, liktiņs i Londona

Vasallllliiiii!

Kai īprīškejū viestuli beidžu, tai itei juosuoc. I tys ir par Londonu – muns mierkis par reizi mienesī tī ir izpiļdeits vyss piec plana. Laiks itūreiz beja vīnkuorši breineigs! Koč kai (pfu, pfu, pfu) maņ labi ar tū laiku i Londonu īt. Sovu reizi ari ir bejs leits, nu tys viņ tai tik mūdis piec.

Sastdiņ piec dorba steidžu iz autobusu. Itūreiz garuoks braucīņs, deļ tuo ka maršruts vede cauri Hītrovys lidūstai. Braucūt vydā Londonā vysod saīt redzēt īlys, kam nūsaukums Edith Grove ci Edith Terrace. Itūreiz tai vaira pasavieru gon ceļā iz tīni, gon atpakaļ i vyspuor taids šmuks rajons. Nabyutu nikas preteimā, ka saītu dzeivuot Londonā, dzeivuot itymā „sovā” rajonā. Nav i cīši tuoli nu centra, kas ari lobs faktors.

Londonā sagaidieja Dāvis, otkon pajiemem velosipedus i braucem iz Londonys latvīšu sātu, kur itūreiz danču vokors ar vītejū folklorys grupu „Austrumkrasts”. Tai kai laiks cīši lobs, tod beidzūt redzieju Londonu kai miļjonu piļsātu – kai ari pi sastdīnis, vysi vozojās pa parkim, īlom, brauc ar velosipedim. Nu cīši daudzi ļaužu. Maņ kai lauku cylvākam tys reizē ir drupeit traumatiski.

Bet nu daņči. Vyss kai piec lobuokajom Reigys tradicejom – nikas nasasuoce laikā, gondreiž vasala stuņde paguoja, cikom sariktieja mikroponus, instrumentus i ļustis varieja suoktīs. Nu suoku divejis dejis nūdoncuoja vītejais TDA, tod puora dzīsmis nu folklorys kūpys i tod nu doncuošona. Ūtrū reizi beju iz pasuokumu itymā sātā, i ari itūreiz beja dzīsmis latgaliski – „Guoju pa mežu” i „Aizalaida sauleite”. Eistyn siļdeja sirdi, mārgys cīši šmuki dzīduoja (var pasaklauseit ITE), bet reizē ari pīruodejums, deļ kuo svareigi vys tik raksteibā ir tys uo, na ō deļ tim, kas vuicuos nu gruomotom ci koč kuo taida.

Dāvis jau beja nūsacīts i namīreigs, bet, kod vyss beidzūt suocēs, atskaluoja, ka daudzim daņčim ite ir Londonys variants, kas atsaškir nu tuo, kai doncoj Latvejā. Jis raudzeja protestēt, bet nu kū tī daudzi. Vīnkuorši doncuojom pa sovam. Tai, ot, i tei folklora ar sovom variacejom par temu atsateista. I itaidūs breižūs ruodīs – tys nikas, ka jau septeņus godus esi doncuojs, zynuojs, prats i bejs tuo kolektiva daļa, kas profesionali nas tū folklorys dejis karūgu. Ite cyts laukums i cyti spielis nūsacejumi.

Vokora laikā beja ari lotereja. Pa 1 mārceņu varieja nūpierkt 5 loterejis biletus i laimēt kaidu nu „Laimys” kampatu kastem, tortu, lyna izstruoduojumim i vēļ vysaidus nīceņus, ari nu vītejim Londonys veikalim. Nūpierku es ari tūs 5 biletus i vēļ 5 dabuoju nu vīna puora, kas guoja paceli i navarieja palikt. Smīkleiguokais – vīnu bolvu dabuoju taišni ar na sovu biletu. I vēļ lobuok – bolva speizdeigi fliterains leoparda uodys roksta kosmetikys maceņš ar lyupu kruosu vydā. Nu „eistyn” maņ pa gaumei.  Bet vysu lobuokais beja ar Dāvi. Bolvā beja ari prass, kuru smejūtīs runuojom, ka dabuosim. Es jam laimiešu ci koč kai tai. Bet – jis pots atroda vīnu loterejis biletu (vīnu gabaleņu nu tim 5) i kai dūmojat? Nui, jis laimieja tū prasu! Tik beiguos atsaroda cylvāks, kam tys bilets beja pazuds. Dāvis gūdeigs, atdeve. Bet golā saguoja tai – tys cylvāks sovu jaunū prasu atdeve Daugovys Vonogu sātāi, bet Dāvis dabuoja ituos sātys vacū prasu. Beiguos vys tik jam tyka tys prass. Smej ci nasmej par liktini, bet nu breinumi nūteik.

Izadoncuojuse beju dyžan labi i steidžu paceli iz naktssātu pi Ingys i Justas. Paļdis Arnoldam i Aivai par Londonys e-talonu, niu varieju labi izmontuot. Maņ pateik cytu piļsātu transportu sistemys i tūs uzvariešona. Ari Londonā pa mozeišam byušu sistemu uzvariejuse. Pi Ingys satyku juos kolegi, latvīšu mārgu nu Modyunis. Kod jei maņ vaicuoja, nu kureinis es asu, sacieju, ka nu bejušuo Bolvu rajona. I smīkleigi beja tys, kod jei gribieja zynuot precizuok. „Nu kureinis taišni? Es zynu Rekovu, Baļtinovu…” „Nu ja, taišni nu tuos Rekovys!” I tai par reizi atsakluoja kūpeigi zynomī ļauds. Pasauļs nav palics leluoks ni par kapeiku.

Svātdiņ iz sātu braucīņs viņ vokorā, bet maņ vysa dīna šmukuo Londonys laika. Pīci minoti pyrma desmitim beju pi muokslys muzeja (Tate Britain) durovom i reizē ari cytim gaideju, kod laiss vydā. Piec stuņdis muokslys pasaulī gon maņ otkon palyka par daudzi informacejis i guoju paceli. Bet iz lapenis daudzi vuordu i ideju par kruosom, skotim i tai tuoļuok. Muoksla mani īdvasmoj. Otkon cīši daudzi nūstaiguoju kuojom tai lieneitem izbaudeidama sauli i piļsātu. Pi parlamenta gon saguoja puorsteigums – izaruod, ka nūtyka Londonys maratons i tī trase, kurai nateic puori. Bet veiksmeigi atrodu vītu, kur vys tik laiž puori itaidus apleik staiguotuojus. Piečuok, kod stuostieju muosai, kū redzieju, jei saceja, ka tuos bejušys profesionaluos sīvītis, kuruos laiž pyrmuos. Taitod varu sev dalikt vēļ vīnu „ček”. Nui, īsadūmuoju, ka tik pfu, pfu, pfu ite nav taidu puorsteigumu kai Bostonys maratonā. Nu vyss labi.

Nazkai ir tai, ka kotru reizi, kod asu Londonā, ir puora vītys, kur vysod aizeju. Nu itūreiz kai vīneigais līders niu ir izavirziejs Trafalgara laukums. Tī asu bejuse vysys četrys reizis. Apsteidze karalīnis sātu, Big Benu i cytys vītys.

Iz trejim Inga beidze dorbu, tod atsagrīzu Londonys „Āgenskolna prīdēs”. Pļuopys, pušdīnis, sābru bārni i dreiži laiks braukt paceli. Ūtrā golā sagaidieja muosa. Tai kai vīsneicā beju pamatuse velosipedu, tod braucem vēļ piec tuo. Līgai piec stuņdis dorbs ari golā, izlēmem ar Sanitu padzert kopeja i pagaideit, cikom jei beigs. Saguoja ari taidys sirsneigys svātdīnis vokora pļuopu stuņdis.

Šudiņ vysom trejom breiva dīna sakryta, kas nav bejs vysu itū laiku cīši cieška nūtikšona. Guojom iz vītejū Mortimer tenisa laukumu paraudzeit tenisa spieli. Nu es jau tai kai īsuociejs i muosom otkon beja par kū pasaprīcuot. Bet, reitu – reitu Jura dīna ar sovom tradicejom. Muosa bīdieja, ka nu reita byus kluotu ar iudiņa spani.

Ite atguoduošonai i sveicīņs Spergai – Jura dīna Reigā pyrma cik tī godu.

Caru, ka reitu byus smīkleigi anekdoti „Ļeņingrad”!

E!

PS Itūreiz fotoaparatu najiemu leidza, slynkums staipeit. Nu vys tik ar teleponu navarieju nūsaturēt.

Advertisements

One thought on “30. viestule / Daņči, liktiņs i Londona

Komentēt

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Mainīt )

Google+ photo

You are commenting using your Google+ account. Log Out /  Mainīt )

Twitter picture

You are commenting using your Twitter account. Log Out /  Mainīt )

Facebook photo

You are commenting using your Facebook account. Log Out /  Mainīt )

Connecting to %s